Slime – Seife

Liebi JublanerInne,
Mir hend für eui wieder emal e Bastelidee zum s Händwäsche chli abentürlicher z gstalte. Viel spass bim nah mache!!

SLIME-SEIFE
Du bruchsch:
– Körperduschmittel
– Kochsalz
– Behälter (z. B es alts Gonfiglas)
– falls gwünscht Lebensmittelfarb und, oder Glitzer (wenn ned vorhande, s gaht also au mit z. B Paprikapulver ;))

1.Schritt:
Gib so viel Körperduschmittel wie gwünscht i din Behälter.

2.Schritt:
Ahschlüssend gisch ca. 1 Teelöfel Chochsalz dezue und dusch alles zeme kräftig vermische, bis es ordetli schumet.

3.Schritt:
Falls er wend chönder de Slime no chli ufpeppe mit z.B. Glitzer oder Lebensmittelfarb. Denn namal kräftig rüere.

4.Schritt:
Jetzt chunnt das Ganze für ca. 20 min in Gfrüürer.

5.Schritt:
Und jetzt wird flissig d Händgwäsche 😉

Damit die Slime-Seife au schön slimig blibt musch en ab und zue wieder chli in Gfrüürer stelle und namal kräftig rüehre.

Viel spass bim Händwäsche! 👏🏻🤲🏻

P.S: Schicked eus doch Föteli oder Videos vo euem Resultat! Mer sind gspannt uf eui Slimies😊

Papierflieger – Wettbewerb

Liebli Jublanerinne und Jublaner

Zum Ziit chli schneller verbi gha lah hemmer für eui en chline Wettbewerbe organisiert!
Wer de schönsti Papierflüger macht cha en chline Priis gwünne😎
Schicket eui Fotis bis am 25. April per Email. scharleitung@jubla-hinwil.ch
No e ganz e schöni Ziit!

Liebi Grüess
Oies Leitigsteam

Katze-Maus-Spiel

Liebi Jublanerinne und Jublaner 🙂
Mir hend wieder emal eh eifachi Spielidee für eu zum dihei nahmache.
Dezue bruchsch du:
Korken, Wolle oder Schnur, Farbe, Cutter, Heissleim und Moosgummi.
1. D Korke mitem Messer oder Cutter halbiere.
2. D Korke farbig bemale, dass jedi Muus eh anderi Farb het, dasmer s Spiel au spiele chan.
3. Wenn d Korke troche sind chasch du d Öhrli und de Wulleschwanz mit Heisslim befestige.

Fürs Spiel bruchsch du:
En Farbwürfel und en Becher. Wenn du kein Farbwürfel dihei hesch, drucksch du am beste eh Würfelvorlag vom Interneh us und machsch din eigene Farbwürfel.

Spielanleitig:
1 Person ischd Katz. Die Person het en Becher und de Würfel. Wenn d Katz z.B. gelb würflet muess sie s gelbe Müsli fange. Die Person mitem gelbe Müsli muess das aber so schnell wie möglich weg zieh. Chan d Katz s Müsli nöd fange, bliebt sie d Katz und würflet solang bis sie es Müsli het chöne fange.

Viel Spass bim spiele!

#jublazuhause #bastelspass #katzemaus #jublahinwil

Last-Minute Osterbastelidee

Hey liebi Jublanerinne und Jublaner

Scho bald isch Ostere und mer hend no eh Last-Minute Bastelidee für eu, will s’heisst au über Ostere #mirbliebeddihei und mir hend oi no en Basteltipp zum de Osterzmorgetisch z verschönere. Es brucht nur ganz wenigi Sache und paar vorigi WC-Papierrolle hender sicher diheime. Ihr chönd eifach de Bildahleitig folge und oii Häslieierbächer selber mache.
Mir freued ois au dasmal wenn ihr fliessig nahbastlet und die entstandene Kunstwerch mit ois uf Instagram, Facebook oder per Mail teiled. 👍🏻
Bliebed gsund und bliebed #dihei

Oies Leitigsteam

Ostergeschenkidee

Hey zämme
Mir hoffed ihr sind alli gsund und munter und bliebed diheime. Will mir au oisi Gruppestunde und Scharaläss im Moment nöd chönd durefüehre hend mir denkt ganz nachem Motto #mirbliebeddihei bringed mir d Gruppestund ab jetzt ih dini Stube.
Ab jetzt chasch du regelmässig Ideä vo dine Leiterinne und Leiter dihei nahmache, bastle und choche bi dir diheime.
Die Wuche startet mer miteme Häsliseckli wo du dini Ostergschenkli chasch verpacke und ah dini liebste aber au ah dini Nachbere, din Pöstler, d Verchäuferin im Lade oder am Samichlaus chasch schenke. 🐣🐰💕
Falls bi dir diheime per Zuefall no ganz vill Zucker ume isch hend mir auno e Chochidee für dich parat was du drus chöntisch mache und det dri fülle. Aber natürli dörfed alli ohni megga vill Zucker diheime die brennte Mandle oder eis vo de andere zwei Rezept nahchoche, ih die Seckli fülle und öperem e freud mache, oder imene Briefchaste go verstecke. Dänked au bim verschänke immer ah gnueg abstand zum niemert ahzstecke.
Mir freued ois druff wenn ihr ganz fliessig nahbastlet und chli Freud ih de Welt verteiled. Gern dörfed ihr d’Ergäbniss uf Instagram oder Facebook mit ois teile.
Alles liebi und bliebed grund!#jublahinwil #jubladiheime #mirbliebeddihei